🍀💐🌚💐🍀 ✍️ بقلم Adel Al-mayasi&يا ليبيا مسكينة .🍀💐🌚💐🍀

ليبيا مسكينة

لا ضى لا ميّة ولا بنزينة ... 

قريب تيبسى
يا ليبيا كيفنّه...
حالك بعد هنتى العبى بالشنّة...
وكيف صار مش قلتى بتبدى جنّة ....
غير ينقشع سيد السبيب علينا ...
هوه السبب درتيه كلّه منه....
وكل المصايب هو جلبها لينا...
وكل العوج والعيب داره لنّا...
هو علّتك كان السبب فايدينه...
وين حجّتك بعد العقيد مشى...
اللى فى حياته شوق حاججتينا ....
هوينا انثرا خلاك فيها هالغنّة...
ترا خبّرى بالله خيرك وينه....

يا ليبيا مسكينة ....لا ضى لا ميّة ولا بنزينة ... قريب تيبسى

شن صار فالبترول...
وشن صار فاللى صكرو الحقول ....
وشن صار فالمحجوز والمنقول ...
والعز هللى بيه واعدتينا...
وشن صار فى بوخة الميثانول ...
والالفين شاب وفوق كملتينا....
وشن صار فالمطار حد القول ...
روعات فيلك حارنين فطينه...
لا تنقلع لا تنهبط معقول ...
هذاى وعدك يا عطيبة لينا...!!

يا ياليبيا مسكينة ....لا ضى لا ميّة ولا بنزينة ... قريب تيبسى

شن صار فالحرية...
وشن صار فيه الدين والغيرية...
ترا خبرى فى قطر كم ابنيّة...
تمشى وترجع بالفضيحة تجينا....
وبيه تبجّح فعلها السبيّة....
قالت نجاهد بالاسلام ودينه...
فاتيلها مسموح قرضاويّه...
لى بو تميم وموزته بعتينا...
وشن صار فاغتصاب الاعلامية....
وحبس الرويمى كم فيه سجينة؟..
وكم روح ماتت وسط الكويفية...
بلا ذنب كانش الاصل ماهو حينه...
فى حبوس ماهى معلنة سريّة...
بلا علم لا خبّار يوصل فينا...
هذا جزاتك والجزى مقضيّة...
والمظلوم حتى ان طال يخلص دينه...

يا ليبيا مسكينة ....لا ضى لا ميّة ولا بنزينة ... قريب تيبسى

شن صار فيه ضميرك....
ستاقظ زعم والا مريح سريرك...
وشن صار فالثوار هل تحريرك...
جاب ثمرته والا العواقب شينة....
وشن صار فى بوشنتك مديرك...
ومفتيك هالدجال لعور عينه...
لوكان فيهم خير شاطر غيرك...
قبلك حواهم سيف من تليينه...
درتيه شى بيديك واقطع ديرك...
لوكان عندك حل هى ورّينا....

يا ليبيا مسكينة ....لا ضى لا ميّة ولا بنزينة ... قريب تيبسى