قصيدة حنين
( لوكان الزمان يحن يرحل بيا
للوادي اللي نطرب اوقات انجيه
الوادي اللي فالدم يجري فيا
والمربى اللي حليت عيني فيه
ما كان ذكرى عابرة ومنسية
ملحه وماه وحاضره وماضيه
وكبدي رقيقة والدموع سخية
وتجود عيني وين مانطريه
ولو بالتمني ماقطعت الجية
ماحد يستغنى على واديه
غير المسافة واسعة وعصية
والعبد عنده قسم ويناديه
ورجلي ثقيلة وقاصرات يديا
مانيش ناسيكم ولا ناسيه
نبي شبحكم يا اللي عزاز عليا
لوكان نلقى تو متمنيه
عندي حنين وكم ذكرى حية
في كل حبة رمل من سافيه
من قور بن جمعة اليا الحطية
وبوزناد والقارة اللي قبليه
ومن الشايلة للعامرة الغربية
اعداد الحجر والعود ها اللي فيه
والموت والحياة والقبر والذرية
مقادير ونعزيه ونواسيه
في ناس غابوا غاليين عليا
جميع من سكن في حومته نعنيه
وفي خاطري شاهي اوقات عشية
في ركن سدرة خير من بوفيه
ومن برج عاجي فيه كم ثريا
وشارع النور الشانزي ليرزيه
تمنيت نسمة باردة وطرية
وبارق شكع والرعد متقفيه
ياخذ ثمان ايام كان شوية
صبح ومسا والليل يقلب فيه
ويحميه ربي من اخباث النية
ويزيده عمار وخير ويهنيه
من يومه وطاته دافية عشرية
وروح ونفس نرقد ونصحى بيه
