إن جيت للكلام .. تقول فوق العادة
عرب صافية ونفوسها ودّادة
تسمع ياما
كلام سمح صافي طيبات أنغامه
كلام عقل وازن ثابتات اختامه
ضربن عروقه وثابتات اوتاده
وميعاد فيه الحاضرين تواما
خوت ع الصفا غصبا على الحسادة
وكل حد يرعى حرمته ومقامه
سادة ومن سادة وضناهم سادة
وكل شيخ للخيرات سافي اكمامه
وغالب سفاسف شهوته وعناده
قرءان ربه هودليل اسلامه
وسنة الهادي الطيبة وارشاده
وخاضعين للمولى وشرع احكامه
الحكم حكمه والعباد عباده
ووين يطلعوا صايم وحل صيامه
كل ماخلق ربي يعده زاده
كماتريبيا ياكل اللي قدامه
تقول عام متقفي ضباب جراده
يلحس اللي قاله وسميح كلامه
آهو كلام نقال في ميعاده
يجري وراء الدنيا يشد حزامه
وحتى ولوعنده يريد زيادة
تباع للفتنة وللنمامة
وفي كل فتنة شايخين اولاده
والشبر عنده يجر بعده قامة
حتى ولو كلف خراب بلاده
يمشط وياكل فيه رزق يتامى
واولاده على سوق الحرام انداده
ونبوا عمار وطالبين سلامة
واحنا قولنا والفعل عكس اضداده
تسمع عقول رزينة
وتسمع كلام العقل حكمة زينة
ووين يختم الميعاد ينسى دينه
مع كل عفن يزيد غير زيادة
راهو خراب الوقت منا فينا
والخل منه فيه سبب فساده
احنا هدمنا ليبيا بيدينا
فالحين غير نطوّقوا مجراده
الواحد بفمه يقول "قال نبينا "
وفي الفعل حتى ابليس خبثه كاده
العاقل يشيل العفن حتى بشينه
وللطايحين يكون هو الرفادة
العاقل سوايا التافهين عوينه
وهو طول عمره للنزيل سنادة
والتافه بلا تفكير فات هوينا
لايحز عركة ولايجيب رشادة
واجد كلام وسمح في اغانينا
والفعل عقب النار غير رماده
صلوا على الهادي العظيم نبينا
وكل حد يعرف منبته وعودا
الشاعر الأديب
عمر رمضان
